Búist við tíu þúsund manns

Landsmót hestamanna hófst að Gaddstaðaflötum við Hellu í morgun og stendur fram á sunnudag. Í dag og næstu daga verða hryssur dæmdar og forkeppnir haldnar en formleg setningarathöfn fer fram síðdegis á fimmtudag og hápunktum mótsins verður náð um næstu helgi. Mótshaldarar eiga von á allt að tíu þúsund gestum, þar af um þrjú þúsund útlendingum. Um fimm hundruð keppendur og aðstandendur þeirra voru komnir á mótsstað undir kvöld í gær og sagði Lárus D. Pálsson framkvæmdastjóri Landsmótsins að þeim myndi fjölga dag frá degi uns hámarkinu væri náð, undir og um helgina.