Heimsókn Hákons og Mette

Hákon krónprins Noregs, Mette-Marit krónprinsessa og dóttir þeirra komu nú síðdegis til Íslands í þriggja daga opinbera heimsókn. Krónprinsinn sagði þau hjónin mjög spennt fyrir heimsókninni til sögueyjarinnar. Heimsókn Hákons krónsprins og eiginkonu hans Mette Marit krónprinsessu hófst á Bessastöðum. Boðað var til blaðamannafundar vegna heimsóknarinnar, en næstu þrjá daga bíður hjónanna umfangsmikil dagskrá bæði á höfuðborgarsvæðinu og úti á landi. Ólafur Ragnar Grímsson, forseti, bauð þau velkomin til landsins og sagði það afar ánægjulegt fyrir íslensku þjóðina að fá þau í heimsókn, enda væri þetta í fyrsta skipti í meira en 1000 ára sögu samskipta Íslands og Noregs sem krónprins, krónprinsessa og dóttir þeirra prinsessan kæmu saman til landsins. Hákon krónprins sagði þau hjónin mjög spennt fyrir heimsókninni, sem væri löngu tímabær . Hákon segir margt tengja Ísland og Noreg og að Norðmenn kunni vel að meta íslenska menningu. Þá sé margt í viðskiptalífinu sem tengi löndin saman til dæmis sjávarútvegurinn. Í kvöld verður sérstakur kvöldverður á Bessastöðum til heiðurs krónprinshjónunum og á morgun heimsækja þau meðal annars Þjóðmenningarhúsið og Þingvelli. Krónprinsinn lagði áherslu á náin samskipti og menningartengsl landanna og um deilu Íslendinga og Norðmanna um það hvort Leifur Eiríkisson væri íslenskur eða norskur sagði hann að við yrðum bara að eiga hann saman. Þá skaut Ólafur Ragnar Grímsson inní að Snorri hefði allavega verið íslenskur.