Flughátíð á Akureyri

Flughátíð er haldin á Akureyri um þessa helgi, vegna 50 ára flugafmælis Arnsgríms Jóhannssonar flugstjóra, sem jafnframt er einn af stofnendum flugfélagsins Atlanta. Það eru sjálfsagt ekki margir einstaklingar sem standa undir heilli flugsýningu, en Arngrímur Jóhannsson, er einn þeirra. Hann flýgur jafnt Boeing breiðþotum sem einshreyfils listflugvélum, og ferst hvort tveggja vel úr hendi. Engin var breiðþotan á Akureyri, í dag, en Arngrímur sýndi hins vegar listflug á Pitts Special flugvél sinni. Fleiri listflugmenn sýndu einnig hvað í þeim bjó. Arngrími þótti sérstaklega gaman að endurnýja kynni sín af elstu svifflugvél sem er í flughæfu ástandi, á landinu, í dag. Það var einmitt á þessari vél sem hann hóf kynni sín af fluginu fyrir rífum 50 árum. Arngrímur flaug sóló strax í sínu fyrsta flugi, því svifflugan tekur ekki nema einn mann. Hann hlustaði því vendilega á leiðbeiningar kennarans, og fór svo í loftið og flaug. Eftir það varð ekki aftur snúið.