Fá lyf sem ekki eru ætluð börnum

Hugsanleganlegt er að rúmlega fimm hundruð íslensk börn og unglingar fái þunglyndislyf sem alls ekki eru ætluð börnum. Notkun þunglyndislyfja á Íslandi heldur áfram að aukast og í samanburði við aðrar Norðurlandaþjóðir er notkunin áfram mest hér á landi. Samkvæmt uppgjöri frá Tryggingastofnun ríkisins (TR) var ávísað rúmlega fimm milljónum og 400 þúsund dagskömmtum þessara lyfja á síðasta ári, en það magn dugir tæplega 15 þúsund manns til meðferðar alla daga ársins. Verðmætið nemur um 880 milljónum króna. Fyrir marga eru þetta ekki nýjar fréttir. Hins vegar er nú, í nýjum gögnum TR, hægt að skoða aldursdreifingu og kyn notenda. Kemur þá í ljós að 320 þúsund dagskammtar, eða 5,7% notkunarinnar, er hjá börnum og unglingum 19 ára eða yngri. Þetta samsvarar því ársnotkun fyrir 880 börn og unglinga. Þar sem einungis eitt af fimm lyfjum eru ætluð börnum er hugsanlegt að verið sé að gefa rúmlega f500 börnum og unglingum lyf sem alls ekki eru skráð með ábendingar fyrir börn. Í Danmörku veldur það nú vaxandi áhyggjum að tæplega 3000 börn undir 17 ára aldri fengu þunglyndislyf á síðasta ári en Danir eru tuttugu sinnum fleiri en við. Væri notkun okkar í takt við notkun þeirra væru hér um 140 börn og unglingar í meðferð en ekki 880.