Greinagerð trúnaðarmál

Greinargerð Ríkisendurskoðunar um hvernig endurskoðendum stofnunarinnar gat sést yfir 260 milljóna króna fjárdrátt í Landssímanum við endurskoðun reikninga, er trúnaðarmál. Landssíminn bað Ríkisendurskoðun um formlegar skýringar en heldur þeim fyrir sig. Hvorki Landssíminn né Ríkisendurskoðun vilja láta fréttastofu stöðvar tvö fá greinagerðina. Ríkisendurskoðun endurskoðar lögum samkvæmt reikninga Landsímans eins og önnur hlutafélög að meirihluta í eigu ríkisins. Fyrirtækið hefur auk þess innri endurskoðun og hefur leitað ráðgjafar hjá öðrum endurskoðendum um einstök atriði. Ríkisendurskoðun skilaði greinargerðinni að beiðni Landsímans um hvernig þeim gat yfirsést fjárdrátturinn við endurskoðun reikninganna. Væntanlega er því að finna í skýrslunni ályktanir um ábyrgð annarra stjórnenda og innra eftirlit Landsímans og það sem út af hafi borið í rekstri fyrirtæksins og valdið því að fjárdrátturinn gat viðgengis jafn lengi og raun bar vitni. Það er þó ekki hægt að staðreyna það þar sem bæði Landsíminn og Ríkisendurskoðun halda skýrslunni leyndri. Eva Magnúsdóttir upplýsingafulltrúi Landsímans segir að aldrei hafi komið til tals að stjórnendur eða endurskoðendur fyrirtækisins bæru ábyrgð á því að ekki komst fyrr upp um fjárdráttinn. Málinu sé lokið að hálfu Landsímans nema hvað varðar hugsanlega skaðabótakröfu á sakborninga í málinu. Brynjólfur Bjarnason forstjóri fyrirtækisins vildi ekki tjá sig um málið. Eins og kom fram í fréttum okkar í gær er ósennilegt að Landsíminn hafi neitt upp úr því að höfða einkamál á hendur sakborningum enda voru eignir þeirra frystar við rannsókn málsins og allt fémætt afhent Landsímanum alls milli 20 og 30 milljónir.