Fyrsta loðnan í land

Fyrsti loðnufarmur vertíðarinnar barst á land í Bolungarvík í dag með Gullbergi. Skipstjórinn segir nóg af loðnu og óhætt sé að veiða meira. Honum finnst út í hött að geyma loðnuna fyrir þorskinn og segir að taka þurfi á loðnuáti hvala. Áhöfnin á Gullbergi landaði um 1200 tonnum í Bolungarvík í dag, en aflann fékk hún í sjö köstum á innan við sólarhring norðaustur af Horni. Skipstjórinn, Eyjólfur Guðjónsson, segir að vel hafi gengið að finna loðnuna. Hann sagði erfitt að meta fjöldann en sagði þetta líta vel út. Að sögn Eyjólfs notuðust þeir við hátíðniasdik til að finna loðnuna. Hann taldi að þetta væri mjög hefðbundin sumarloðna. Loðnan virðist vera á norðurleið, en Gullbergið tekur þátt í rannsóknarleiðangri ásamt fjórum öðrum skipum og hefur leyfi til að fara tvo túra. Að mati Eyjólfs er óhætt að veiða mun meira en það. Hann segist ekki trúa öðru en að Hafrannsóknastofnunin taki undir þá skoðun. Eyjólfur telur að taka þurfi á því hversu mikið hvalir éta af loðnu, en telur ekki mikið vit í því að geyma loðnuna fyrir þorskinn eins og nefnt hefur verið. Þorskurinn éti ekki loðnuna nema hún syndi nálægt honum, það geri hún hins vegar ekki.