Fallið frá kæru

Fallið hefur verið frá kæru til Hæstaréttar vegna gæsluvarðhaldsúrskurðar yfir þremur Palestínumönnum sem komu til Íslands í maí með fölsuð eða stolin vegabréf. Mönnunum var vísað úr landi á þriðjudag og miðvikudag, samkvæmt úrskurði Útlendingastofnunar, og eru þeir nú í Noregi, þar sem samþykkt var að taka við þeim. Þeir voru úrskurðaðir í gæsluvarðhald meðan þeir dvöldu hérlendis, og var sá úrskurður kærður til Hæstaréttar. Talsmaður Palestínumannanna sagði í samtali við fréttastofu í dag að fallið hefði verið frá kærunni, enda hefði hún enga þýðingu, þar sem mennirnir hefðu yfirgefið landið. Enn er þó beðið afstöðu dómsmálaráðuneytisins til málsins, en talsmaður mannanna mun skila ráðuneytinu greinargerð og mun ráðuneytið taka brottvísunarkröfu Útlendingastofnunar fyrir.