Samkeppni í bensínverði virk

Verð á bensínlítra er rúmlega níu krónum dýrara á hvern lítra á landsbyggðinni en á höfuðborgarsvæðinu. Brynhildur Pétursdóttir, starfsmaður Neytendasamtakanna, segir forsendu lágs bensínverðs vera að tvær sjálfsafreiðslustöðvar frá sitt hvoru fyrirtækinu séu til staðar. "Þar sem fleiri en ein sjálfsafgreiðslustöð er, Atlantsolía, ÓB, Orkan eða Egó, þar er samkeppni. Um leið og þú ert komin til Akureyrar þar sem Orkan er ein er verðið hærra," segir Brynhildur og bætir við: "Bensínverð virðist tilviljunarkennt svo ekki sé meira sagt og þótt að fleiri en einn aðili séu með starfsemi á sama stað virðist það ekki endilega trygging fyrir lægra verði. Fjarlægðin frá Reykjavík virðist heldur ekki skipta höfuðmáli né nálægð við þéttbýli." Gunnar Skaptason, framkvæmdastjóri Bensínorku sem rekur Orkuna, svaraði aðspurður um hverju það sætti. "Það er mismunandi samkeppni á markaðinum á mismunandi svæðum." Brynhildur segir samkeppnina vera að virka. "Best fyrir neytendur væri ef Atlantsolía gæti dreift sér meira. Þeir hafa sett samkeppnina af stað." Hugi Hreiðarson, kynningar- og markaðstjóri Atlantsolíu, segir fyrirtækið vilja skjóta rótum áður en það stækki frekar á landsvísu. "Við vonumst til að komast til Reykjavíkur á þessu ári."