Golfklúbbi mismunað

Starfsmannaráð Ríkisspítalanna hefur á þriðju milljón króna í tekjur ár hvert af Golfklúbbi Kópavogs og Garðabæjar í formi 50 árskorta sem renna til ráðsins. Framkvæmdastjóri golfklúbbsins segir klúbbinn ekki sitja við sama borð og önnur íþróttafélög. Vífilstaðaland er í eigu Garðabæjar nema umhverfi Vífilstaðaspítala og það svæði sem golfklúbburinn nýtir. Það svæði tilheyrir ríkinu. Ætlunin var að þar risi hátæknisjúkrahús en af því verður ekki. Landleigan sem golfklúbburinn innir af hendi ár hvert eru 50 árskort að golfvellinum en þeim hefur fjölgað úr 30 frá því upphaflegur leigusamningur var gerður. Andvirði kortanna, sem er á þriðju milljón, rennur ekki í ríkissjóð heldur fær Starfsmannaráð Ríkisspítalanna kortin til umráða og selur þau starfsfólki og mökum þeirra fyrir um 30 þúsund krónur. Golfklúbburinn selur árskortin hins vegar á um 50 þúsund krónur. Þar á bæ eru menn ekki par sáttir við að spítalinn auglýsi kortin til sölu í samkeppni við völlinn. Jóhann Gunnar Stefánsson, framkvæmdastjóri Golfklúbbs Kópavogs og Garðabæjar, segir aðspurður að leigan sé ekki há fyrir allt það landssvæði sem um er að ræða en finnst samt óeðlilegt að íþróttafélag sé að greiða leigu fyrir félagsaðstöðu sína.    Á tólfta hundrað félagar eru í Golfklúbbi Kópavogs og Garðabæjar sem er sá annar stærsti á landinu. Forsvarsmenn hans segjast ítrekað hafa sóst eftir leyfi til ríkisins til að bæta aðstöðuna. Þeim beiðnum hefur ávallt verið hafnað eða svar við erindum klúbbsins hefur ekki verið svarað. Jóhann Gunnar segist ekki hafa skýringu á því hvers vegna svo sé. Fréttatofan náði ekki tali af forráðamönnum eignasviðs Landsspítalans í dag.