Samræði við 13 ára stúlku

Héraðsdómur Reykjaness dæmdi í dag ungan pilt fyrir að hafa haft samræði við þrettán ára stúlku. Pilturinn var fimmtán ára þegar hann framdi brotið. Stúlkan og pilturinn voru kærustupar um tíma, alla vega að mati stúlkunnar, og höfðu samfarir í það minnsta fjórum sinnum á fjögurra mánaða tímabili. Stúlkan bar að í a.m.k. eitt skipti hafi pilturinn neytt hana til samfara en hann neitar sök. Í niðurstöðu Héraðsdóms segir að ekkert hafi komið fram í málinu sem gefi tilefni til þess að ætla að frásögn stúlkunnar sé röng svo einhverju skipti og það þyki sannað, þrátt fyrir eindregna neitun piltsins, að hann hafi gerst sekur um það sem honum var gefið að sök. Hann taldist því hafa brotið gegn 202. grein almennra hegningarlaga en þar segir að hver sem hafi samræði eða önnur kynferðismök við barn yngra en 14 ára skuli sæta allt að 12 ára fangelsi. Við ákvörðun refsingar var litið til þess að pilturinn var aðeins 15 ára þegar brotin voru framin og samræði hans og stúlkunnar hafi ekki verið gegn vilja hennar. Hins vegar beri að taka tillit til þess að brotin beindust gegn mikilsverðum hagsmunum 13 ára stúlku sem ekki hafði þroska til að meta hvort hún væri reiðubúin til þess að stunda kynlíf. Pilturinn var því dæmdur í tveggja mánaða skilorðsbundið fangelsi og til greiðslu alls sakarkostnaðar.