Bókhald Landssímans var í ólestri

Bókhald Landssímans var í ólestri, reikningar ekki skráðir fyrr en við greiðslu og margir óstemmdir biðreikningar. Þetta sagði Sveinbjörn Kristjánsson fyrir dómi en í gær fékk hann þungan fangelsisdóm vegna Landssímamálsins. Landssíminn íhugar að höfða einkamál á hendur fjórmenningunum sem hlutu dóm í málinu en skaðabótakröfu félagsins upp á 246 milljónir var vísað frá dómi í gær. Fyrirtækið telur dóm Héraðsdóms leggja grunn að bótaskyldu sakborninganna en Sveinbjörn Kristjánsson viðurkenndi bótaskyldu fyrir dómi en hin ekki. Bótakröfur fá sjaldnast framgang í viðamiklum málum og eru einkamál yfirleitt höfðuð í kjölfarið líkt og í þessu máli. Í dómnum segir að bótakrafa fyrirtækisins hafi ekki verið nægilega reifuð. Til að mynda hafi ekki komið fram hvort Landssíminn hafi leitast við að gera kröfur gegn þeim einkahlutafélögum sem féð rann til. Þar má nefna, auk Alvöru lífsins sem fékk 160 milljónir sem runnu óskertar inn í rekstur Skjás eins, Hanann, Lífstíl og Hafskip. Eignir hlutafélaganna og sakborninganna, þar á meðal íbúðir, hlutabréf og bifreiðar, voru kyrrsettar á sínum tíma og andvirði þeirra rann til Landssímans. Alls voru það ekki nema 20-30 milljónir. Ekki er hægt að ganga að Skjá einum, samkvæmt heimildum Stöðvar 2, og Alvara lífsins á ekki krónu. Hið sama er að segja um einkahlutafélögin. Öll verðmæti sem eftir voru hafa þegar runnið til Landssímans. Einkamál mun því varla hafa í för með sér nema kostnað fyrir Landssímann en krafan mun standa á sakborningunum um ókomna framtíð. Sveinbjörn Kristjánsson leysti út tékka úr sjóðum Landssímans, millifærði um bankalínu út af reikningi fyrirtækisins og dró sér fjármuni af bankareikningi þess með því að breyta textaskrám í rafrænu greiðslukerfi sem leiddi til þess að greiðslur runnu inn á reikninga hans eða reikninga tengdum honum. Þetta fór alfarið fram hjá endurskoðendum og forráðamönnum Landssímans og kaupa þurfti aðstoð sérfróðra manna fyrir þrettán milljónir til að upplýsa hvernig staðið var að fjárdrættinum. Sveinbjörn sjálfur aðstoðaði við að varpa ljósi á málið. Sé horft til lýsinga sakborningsins sjálfs á því hvernig bókhaldi Landssímans var háttað hljóta það að hafa verið kjöraðstæður fyrir fjársvikara og enga brakandi snilld hefur þurft til að fara fram hjá eftirlitskerfi Símans. Sveinbjörn segir að bókhald fyrirtækisins hafi verið í slæmu ásigkomulagi. Margir óstemmdir biðreikningar hafi verið til staðar og ekki hafi verið vitað hvaða reikningar væru á leið til félagsins. Því hafi í raun verið lítil yfirsýn yfir reksturinn.