Hvannadalshnúkur lækkar

Hvannadalshnúkur hefur lækkað um átta metra samkvæmt nýrri mælingu Jöklarannsóknafélags Íslands. Hann mælist nú 2111 metra yfir sjó en hefur hingað til verið skráður 2119 metrar. Í ár eru 100 ár síðan Hvannadalshnúkur var mældur af liðsforingjanum J.P. Koch, landmælingamanni danska herforingjaráðsins, og af því tilefni ákvað Jöklarannsóknafélag Íslands að endurmæla hæð hnúksins með nákvæmum GPS tækjum í árlegri vorferð á Vatnajökul sem farin var 4.-12. júní. Jarðeðlisfræðingur á Veðurstofu Íslands hefur nú unnið úr mælingunum og er niðurstaðan sem fyrr sagði, 2111 m. Óvissan í mælingunni er sögð vera um einn metri og segir í fréttatilkynningu að rétt sé að líta á niðurstöðuna sem bráðabirgðatölu. Toppur Hvannadalshnúks er líka jökulfönn, á að giska 20-30 m þykk, og því séu líkur á að hæðin sé eitthvað breytileg eftir árferði og árstíðum.