Loðnan fundin

Með samstilltu átaki hnúfubaka, flugmanns og grálúðusjómanna fannst loðnan loksins í gærkvöld, norðaustur af Hornbjargi, og hefur eitt skip þegar fengið góðan afla. Sjómenn og útvegsmenn, og reyndar fleiri sem láta þjóðarhag sig varða, voru orðnir áhygjufullir af því að engin loðna hafði fundist í nokkra mánuði, þrátt fyrir leit. Að öllu eðlilegu hefði vertíðin verið komin í fullan gang fyrir viku. Það var ákveðið að senda þrjú loðnuskip til leitar í fyrradag og tvö í gær, auk þess sem Hafrannsóknaskipið Árni Friðriksson heldur til leitar á morgun og á að stjórna leitinni. Í gærkvöld fékk svo áhöfnin á Gullbergi ábendingu um það frá athugulum flugmanni að háhyrningar væru í æti norðaustur af Horni. Þá greindu grálúðusjómenn, sem eru að veiðum á sömu slóðum, frá því að loðna væri í maga grálúðunnar. Auk þess sæjust einhverjar torfur á fiskileitartækjum. Áhöfnin á Gullberginu hélt því á staðinn og fékk strax 350 tonn í tveimur köstum og er komin með yfir 500 tonn. Annað skip var að koma á svæðið rétt fyrir hádegi og er að kasta - og það þriðja er á leiðinni. Skipverjar þar um borð eru þegar farnir að sjá dreifðar torfur. Þetta er mikill léttir fyrir sjómenn og útvegsmenn og er þess nú beðið í ofvæni hvernig mælingar Hafrannsóknastofnunar koma út, þegar Árni Friðriksson verður kominn á veiðislóðina.