Vilja aðstöðu fyrir hjólabretti

Tveir hjólabrettadrengir, þeir Birkir Kristján Guðmundsson og Daníel Kristjánsson, gengu á fund bæjarstjórans á Seltjarnarnesi á dögunum og afhentu honum undirskriftalista til stuðnings hugmynd þeirra um hjólabrettasvæði á Seltjarnarnesi. Á listanum voru tæplega 130 nöfn áhugamanna um hjólabretti og línuskautaiðkun en Birkir Kristján og Daníel segja aðstæður til iðkunar íþróttarinnar takmarkaðar á Nesinu. Rampur sem settur hafi verið upp fyrir nokkru henti fyrst og fremst fyrir línuskauta, það vanti handrið eða grindur sem hægt sé að stökkva upp á og renna sér eftir. Þá segja þeir að það sé ekki vel séð að fólk sé á hjólabrettum inni á Eiðistorgi þó sumir hafi stolist til að renna sér þar. Jónmundur Guðmarsson bæjarstjóri lýsti ánægju með framtak drengjanna og tók jákvætt í hugmyndir þeirra. Hann sagði að farið yrði vandlega yfir málið og skoðað hvort ekki fyndist góður staður þar sem hægt væri að byggja upp aðstöðu fyrir hjólabrettafólk.