Framkvæmdir hefjast í haust

Bæjarráð Fjarðabyggðar hefur samþykkt að sveitarfélagið greiði fimmtán prósent kostnaðar við uppbyggingu hjúkrunardeildar Fjórðungssjúkrahússins í Neskaupstað. Búist er við að framkvæmdir hefjist í haust og taki um tvö ár. Gert er ráð fyrir að kostnaður við endurbyggingu gamla hluta sjúkrahússins kosti í kringum 200 milljónir, en verkið verður boðið út á næstu vikum. Bæjarráð Fjarðabyggðar samþykkti enn fremur á fundi í fyrradag að leggja fram allt að tíu milljónir til verksins á þessu ári, þó svo að samningur sveitarfélagsins við heilbrigðisráðuneyti liggi ekki fyrir.