Dalvíkingur í dollarasmygli

Dalvíkingur á fertugsaldri hefur undanfarið rúmt ár tapað fjórum milljónum eftir að hann reyndi að aðstoða Nígeríumann og Suður-Afríkana við að ná 20 milljón dollurum út af bankareikningi og koma þeim undan til Kanada. Hann hélt að hann myndi græða 300 milljónir með því að hjálpa til við að flytja hálfan annan milljarð úr banka í Lagos í Nígeríu í gegnum Höfðaborg og þaðan til London. Upphæðin sem um ræðir er 20 milljón dollarar og hann átti að fá 20 prósent í umbun. Dalvíkingurinn fékk að sjá fulla álkistu af dollaraseðlum í Madrid á Spáni en grunaði þá að brögð væru í tafli. Um miðjan júní var honum tilkynnt að MI6, breska leyniþjónustan væri á hælum hans en hann gæti sloppið með því að greiða um 3. milljónir íslenskra króna. DV rannsakaði þetta mál og komst að því að breski bankinn er ekki til og Dalvíkingurinn hafði lent í klóm fjársvikara. Hann hefur ákveðið að láta lögregluna hafa öll sín gögn og er tilbúinn til að hjálpa Interpol við að ná svikurunum. DV ræðir við manninn í blaðinu á fimmtudag og lýsir svikamálinu í smáatriðum.