„Afsturlunarte“ á Jónsmessunótt

Jónsmessunótt er í nótt. Af því tilefni munu einhverjir velta sér naktir upp úr dögg en fleira stendur til boða. Til dæmis verður Miðnætur- og Ólympíuhlaup í Laugardalnum klukkan 21 í kvöld og líkt og undanfarin ár munu kynngimagnaðir atburðir eiga sér stað í Fjölskyldu- og húsdýragarðinum. Garðurinn verður opinn frá klukkan 23 í kvöld til 1 eftir miðnætti og aðgangur verður ókeypis. Brenna verður í Þjófadölum við Harmónikkuleik, furðuverur verða á sveimi og spákona spáir fyrir gestum. Dýrahúsin verða opin en vissara er að loka fjósinu yfir miðnættið þar sem kýrnar eiga það til að mæla á Jónsmessunótt og þeir sem heyra tal þeirra - sturlast. En ef einhver skyldi sturlast þarf sá hinn sami ekki að örvænta þar sem afsturlunarte verður á boðstólum fyrir þá sem á þurfa að halda.