Árni Þór áfrýjar dómnum

Árni Þór Vigfússon, fyrrverandi sjónvarpsstjóri Skjás Eins, mun áfrýja dómi Héraðsdóms Reykjavíkur í Landssímamálinu svokallaða sem kveðinn var upp síðdegis, að sögn lögmanns hans, Gests Jónssonar. Árni Þór var dæmdur í tveggja ára fangelsi líkt og Kristján Ragnar Kristjánssons, fyrrverandi fjármálastjóri Skjás Eins, fyrir hylmingu, móttöku og ráðstöfun á annað hundrað milljóna frá Sveinbirni á árunum 1999-2001. Ekki hafa fengist svör við því hvort Kristján áfrýi dómnum en talið er líklegt að svo muni fara.    Sveinbjörn Kristjánsson, fyrrverandi aðalgjaldkeri Landssímans og höfuðpaurinn í málinu, var dæmdur í óskilorðsbundið fjögurra og hálfs árs fangelsi. Ragnar Orri Benediktsson var dæmdur í óskilorðsbundið 8 mánaða fangelsi. Stúlka sem tengdist málinu var sýknuð af ákæru. Skaðabótakröfu Landssímans var vísað frá dómi á þeim forsendum að hún þurfi aðra og frekari umfjöllun. Sveinbjörn var dæmdur fyrir fjárdrátt upp á 261 milljón króna úr sjóðum Landssímans. Brotin áttu sér stað frá maí 1999 til maí 2003. Eins og áður sagði voru Árni Þór og Kristján dæmdir fyrir hylmingu, móttöku og ráðstöfun á annað hundrað milljóna frá Sveinbirni á árunum 1999-2001. Ákæran byggði meðal annars á því að Árna og Kristjáni hafi báðum verið kunnugt um að Sveinbjörn hafi með refsiverðum hætti komist yfir fjármunina hjá Landssímanum. Ragnar Orri hlaut dóm fyrir hylmingu sem meðal annars fólst í viðtöku og notkun á mánaðarlegum greiðslum frá júlí 2001 til júní 2002. Árni Þór, Kristján og Ragnar Orri lýstu allir yfir sakleysi sínu en í niðurstöðu dómsins segir að þegar litið er til gagna málsins, og því sem fram kom í meðferð þess, fái framburður þeirra engan veginn staðist. Sveinbjörn játaði hins vegar sök.