Dómur fallinn í Landssímamálinu

Dómur féll í Landssímamálinu svokallaða í Héraðsdómi Reykjavíkur klukkan 14. Sveinbjörn Kristjánsson, fyrrverandi aðalgjaldkeri Landssímans og höfuðpaurinn í málinu, var dæmdur í óskilorðsbundið fjögurra og hálfs árs fangelsi. Árni Þór Vigfússon og Kristján Ragnar Kristjánsson voru dæmdir í óskilsorðsbundið tveggja ára fangelsi hvor. Ragnar Orri Benediktsson var dæmdur í óskilorðsbundið 8 mánaða fangelsi. Stúlka sem tengdist málinu var sýknuð af ákæru. Skaðabótakröfu Landssímans var vísað frá dómi á þeim forsendum að hún þurfi aðra og frekari umfjöllun. Sveinbjörn var dæmdur fyrir fjárdrátt upp á 261 milljón króna úr sjóðum Landssímans. Brotin áttu sér stað frá maí 1999 til maí 2003. Árni Þór, sem er fyrrverandi sjónvarpsstjóri SkjásEins, og Kristján Ragnar, sem er fyrrverandi fjármálastjóri sjónvarpsstöðvarinnar og bróðir Sveinbjörns, hlutu dóm fyrir hylmingu, móttöku og ráðstöfun á annað hundrað milljóna frá Sveinbirni á árunum 1999-2001. Ákæran byggði meðal annars á því að Árna og Kristjáni hafi báðum verið kunnugt um að Sveinbjörn hafi með refsiverðum hætti komist yfir fjármunina hjá Landssímanum. Ragnar Orri hlaut dóm fyrir hylmingu sem meðal annars fólst í viðtöku og notkun á mánaðarlegum greiðslum frá júlí 2001 til júní 2002. Árni Þór, Kristján og Ragnar Orri lýstu allir yfir sakleysi sínu en í niðurstöðu dómsins segir að þegar litið er til gagna málsins, og því sem fram kom í meðferð þess, fái framburður þeirra engan veginn staðist. Sveinbjörn játaði hins vegar sök.