Þrýstingur í stað þvingana

Bandarísk stjórnvöld ætla ekki að beita Íslendinga viðskiptaþvingunum þrátt fyrir að Bandaríkjaþing hafi lýst áhyggjum af hvalveiðum Íslendinga í vísindaskyni í gær. Þess í stað stendur til að beita pólitískum þrýstingi. George Bush, forseti Bandaríkjanna, sendi þinginu bréf þar sem hann segir meðal annars að ekki sé talið vænlegt að beita efnahagslegum þvingunum til að knýja Íslendinga til að hætta við vísindaveiðar. Reynt verði að beita diplómatískum aðferðum en sú stefna verði endurskoðuð ef þörf krefji. Viðskiptaráðherra Bandaríkjanna, Donald Evans, mælti fyrir nokkru með innflutningshömlum til að refsa Íslendingum fyrir veiðarnar og sagði af því tilefni að óþarfi væri að drepa hvali til að rannsaka þá. Bandarískum sendinefndum, sem fjalla um málefni sem snerta hvali, verður meðal annars falið að koma sjónarmiðum Bandaríkjastórnar á framfæri við íslenskar sendinefndir, hvar sem þær hittast. Í bréfi sínu segir Bush að Bandaríkjamenn efist um gildi rannsóknanna sem vísindaveiðarnar byggi á. Greenpeace samtökin hafa ekki tjáð sig um þessa niðurstöðu, eftir því sem fréttastofan kemst næst, en þau hafa áður fagnað þeirri ákvörðun Íslendinga að ætla ekki að veiða nema 25 hrefnur í vísindaskyni í ár.