Tveir fyrir dóm vegna bankaráns

Tuttugu og eins árs maður játaði fyrir Héraðsdómi Reykjavíkur í gær að hafa framið vopnað bankarán í úitibúi Búnaðarbanka Íslands að Vesturgötu í Reykjavík 17. nóvember í fyrra. Málið var þingfest í gær. Í ákæru ríkissaksóknara segir, að sá eldri, sem er 25 ára, hafi látið yngri manninum í té hníf og lambhúshettu, sem hann hafi hulið andlit sitt með, er hann fór inn í bankann og ógnaði tveimur gjaldkerum með hnífum. Neyddi hann annan gjaldkerann til að láta af hendi 430 þúsund krónur í peningaseðlum, sem maðurinn hafði síðan á brott með. Hlutdeild eldra mannsins er einnig sú, að hann ók hinum yngri að Búnaðarbankanum þann sama dag, beið hans í bifreiðinni skammt frá á meðan hann fór inn í bankann. Eldri maðurinn ók hinum síðan frá vettvangi með ránsfenginn. Hann játaði aksturinn fyrir dómi en neitaði hann sök að öðru leyti. Krefst ákæruvaldið þess að mennirnir verði dæmdir til refsingar samkvæmt 252. grein almennra hegningarlaga, sem kveður á um allt að 10 ára fangelsi og 16 ára, hafi mjög mikil hætta verið samfara ráninu. Þá krefst Vátryggingafélag Íslands bóta að fjárhæð 396.500 krónur.