Enn stímir Landspítalinn framúr

Bráðabirgðauppgjör Landspítala háskólasjúkrahúss eftir fyrstu fimm mánuði ársins sýnir 99.5 m.kr. umfram fjárheimildir tímabilsins eða 0,9%. Þetta kemur fram í stjórnunarupplýsingum spítalans fyrir tímabilið janúar til maí. Launagjöld eru 0,6% umfram áætlun og rekstrargjöld 2,4% umfram áætlun. Kostnaður vegna S-merktra lyfja eykst um 9,2% en lyfjakostnaður í heildina eykst um 4,6% frá fyrra ári. "Við fengum fyrstu áætlunina frá LSH í febrúar," sagði Einar Oddur kristjánsson varaformaður fjárlaganefndar Alþingis, sem sæti á ásamt fimm öðrum í tilsjónarnefnd með rekstri spítalans. "Við fórum yfir hana og sendum ráðherra álit okkar á því í marsmánuði. Hann sendi það síðan áfram til forráðamanna spítalans. Við töldum þá að þeir ættu mjög langt í land með að aðgerðir þær sem þeir gripu til í janúar - febrúar dygðu." Einar Oddur sagði enn fremur, að nefndin myndi fara yfir stöðuna eins og hún væri nú og gef ráðherra skýrslu. Í stjórnunarupplýsingunum kemur einnig fram, að skurðaðgerðum fjölgaði fyrstu fimm mánuði ársins um 2,4% frá fyrra ári að meðtöldum ferliverkaaðgerðum á augum. Aðgerðum fjölgaði í almennum skurðlækningum, augnlækningum, barnaskurðlækningum, brjóstholsskurðlækningum, bæklunarlækningum, þvagfæraskurðlækningum og æðaskurðlækningum. Fækkun var á aðgerðum í háls-, nef- og eyrnalækningum, heila- og taugaskurðlækningum, kvenlækningum og lýtalækningum. Legur á bráðadeildum sjúkrahússins standa nokkurn veginn í stað en legudögum hefur fækkað um 6,8%. Meðallegutími styttist úr 8,7 dögum í 8,1 daga. Ef aðeins er litið til meðallegutíma á bráðadeildum sjúkrahússins þá styttist hann úr 5,0 dögum í 4,9 daga. Komum á göngudeildir fjölgar um 7,0% en fækkar á dagdeildum um 1,9%. Umtalsverð fjölgun er á slysa- og bráðamóttökur spítalans, aðallega á Hringbraut, á bráðamóttöku barna, bráðamóttöku geðdeilda og almenna bráðamóttöku við Hringbraut. Aukningin er 5,3% frá síðasta ári.