Hvellir hvekktu flugfarþega

"Það komu þrír háværir hvellir hver á eftir öðrum og eldtungur stóðu úr einum hreyflinum í smástund," segir Vernharður Linnet dagskrárgerðarmaður, en hann var ásamt 150 öðrum Íslendingum á leið úr sumarfríi á eynni Krít þegar miklir hvellir heyrðust í hreyfli vélar Icelandair við flugtak. Fengu allmargir farþegar nokkuð áfall en vélin hélt þó áfram flugi sínu og lenti heilu og höldnu á Keflavíkurflugvelli í fyrrakvöld. Boðið var upp á áfallahjálp við komuna þangað. "Það sem kannski var erfiðast var að allt rafmagn fór af um tíma eftir að þetta gerðist og ljóslaust var á meðan en ég tók þó eftir að yfirflugfreyjunni stóð ekki á sama. Innan skamms tilkynnti flugstjórinn þó að allt væri með felldu og að líkindum hefði verið um yfirfyllingu af eldsneyti að ræða. Flugbrautin þarna er fremur stutt og þeir þurfa að gefa vel inn fyrir flugtak en ferðin gekk að óskum eftir þetta." Um borð í vélinni voru ásamt öðrum tveir þjóðkunnir alþingismenn, Steingrímur J. Sigfússon og Jónína Bjartmarz. Steingrímur gerir lítið úr atvikinu og segir að hann gæti eins hætt í starfi sínu sem stjórnmálamaður ef hann kippti sér upp við slík óhöpp. "Eðlilega fór þó um marga sem um borð voru en viðbrögð flugmanns og áhafnar voru til fyrirmyndar. Það tóku einhverjir það nærri sér að flugstjórinn tilkynnti ekki strax hvað hefði átt sér stað eða hvort allt væri með felldu en auðvitað þurfti hann að kanna tékklista sína og mæla áður en hann gat vitað eitthvað sjálfur. Öll áhöfnin stóð sig með mestu prýði alla leiðina og á þakkir skildar en vitaskuld er auðvelt að gera sér í hugarlund að fyrir fólk sem er flughrætt að þetta hafi skotið þeim skelk í bringu. Icelandair bauð svo upp á áfallahjálp og veitingar þegar lent var og einhverjir notfærðu sér það."