Meðferð Palestínumannanna gagnrýnd

Tveimur af þremur Palestínumönnum, sem handteknir voru með fölsuð vegabréf fyrir skömmu, var í dag vísað úr landi, og sá þriðji fer á morgun. Meðferð mannanna er gagnrýnd og segja lögmenn þeirra málsmeðferð brenglaða. Palestínumennirnir komu til Íslands með Norrænu í byrjun maí og framvísuðu fölsuðum eða stolnum vegabréfum við komuna til landsins. Þeir voru handteknir og óskuðu eftir hæli, en hælisbeiðni þeirra var vísað frá, þar sem grunur lék á að þeir tengdust alþjóðlegri glæpastarfsemi. Þeir voru úrskurðaðir í þriggja vikna gæsluvarðhald, sem rann út síðastliðinn miðvikudag, en voru handteknir aftur og úrskurðaðir í varðhald þar til þeim verður vísað úr landi. Strangt til tekið er eðlilegt að hælisleitendum sé vísað til þess Schengen-ríkis, þar sem þeir sóttu fyrst um hæli, í þessu tilviki Noregs. Verjendur mannanna í lögreglurannsókninni og talsmaður þeirra í brottvísunarmálinu gera alvarlegar athugasemdir við málsmeðferðina, sem þeir telja ekki lokið. Annars vegar var gæsluvarðhaldsúrskurðurinn kærður til Hæstaréttar, sem hefur ekki enn tekið afstöðu til málsins. Hins vegar var brottvísunin kærð til dómsmálaráðuneytisins, sem hefur ekki heldur kveðið upp úr um málið. Niðurstöður þessara æðri stjórnvalda skipta nú engu máli, þar sem tveimur mannanna var vísað úr landi í dag og sá síðasti hverfur af landi brott á morgun. Lögmennirnir telja þetta óeðlilegt, í fyrsta lagi hafi hvorki Hæstiréttur né dómsmálaráðuneytið fengið málsgögn í hendur fyrr en í gær, og annars vegar hefði verið eðlilegt að bíða úrskurðar, áður en mennirnir voru sendir á brott.