Ekki síðustu ótíðindin

Um tuttugu manns verður sagt upp um mánaðarmótin hjá Varnarliðinu á Keflavíkurflugvelli. Þeir bætast í hóp þeirra 126 sem sagt hefur verið upp frá 1. október vegna hagræðingar í rekstri Bandaríkjaflota. Kristján Gunnarsson, formaður Verkalýðs- og sjómannafélags Keflavíkur, segir fréttirnar mjög slæmar fyrir erfitt atvinnuástand á Suðurnesjum. "Legið hefur í loftinu að það kynnu að verða slíkar fréttir og við höfum búist við því að þetta séu ekki síðustu ótíðindin af þessum bæ. Það blasir við að þetta er mesti samdráttur frá upphafi," segir Kristján. Friðþór Eydal, upplýsingafulltrúi Varnarliðsins, segir ekki ljóst hvort uppsagnir verði fleiri. "Það er ekkert hægt að segja til um það." Uppsagnafrestur starfsmanna er frá einum og upp í sex mánuði. Þeim hefur verið boðin ráðgjöf vinnusálfræðings og aðstoðar ráðningarþjónustu í leit að öðrum störfum. Þeir sem vilji vinna áfram hjá Varnarliðinu fá einnig aðstoð en Friðþór segir að átján starfsmenn sem sagt var upp hafi verið endurráðnir í önnur störf hjá Varnarliðinu. Alls vinnur 751 Íslendingur hjá Varnarliðinu um þessar mundir.