Fleiri uppsagnir hjá varnarliðinu

Um tuttugu starfsmönnum flotastöðvar varnarliðsins á Keflavíkurflugvelli verður sagt upp störfum frá og með næstu mánaðamótum. Þetta kemur fram í fréttatilkynningu sem varnarliðið sendi frá sér í dag og hafa þessar ráðstafanir verið kynntar íslenskum stjórnvöldum. Alls hefur því rúmlega hundrað starfsmönnum verið sagt upp störfum hjá Varnarliðinu undanfarin misseri. Fyrirhugaðar breytingar í starfsliði flotastöðvarinnar voru kynntar fulltrúum stéttarfélaga í morgun, en breytingarnar eru tilkomnar vegna hagræðingar í rekstri bandaríska flotans. Uppsagnarfrestur starfsmanna er frá einum og upp í sex mánuði og verður þeim veitt aðstoð við aðlögun og við atvinnuleit. Umræddum starfsmönnum býðst að leita, sér að kostnaðarlausu, ráðgjafar vinnusálfræðings og aðstoðar ráðningarþjónustu við leit að starfi á almennum vinnumarkaði. Í fréttattilkynningu varnarliðsins segir að umræddar ráðstafanir hafi hvorki áhrif á skyldur flotastöðvarinnar í tengslum við rekstur Keflavíkurflugvallar, né þjónustu við varnarliðið. Þá snerti þær ekki varnarsamning Íslands og Bandaríkjanna, og ekki heldur umræður um framtíð varnarliðsins, eða endurskoðun á viðbúnaði bandaríkjahers á heimsvísu, sem nú sé til skoðunar.