Vieri í Skagaham

Ítalski framherjinn Christian Vieri rauk út af blaðamannafundi eldrauður í framan og fjúkandi illur eftir að ítalskir fjölmiðlamenn fullyrtu að andinn innan ítalska liðsins væri ekki upp á það allra besta. Þeir fullyrtu að Vieri og markvörðurinn, Gianluigi Buffon, hefðu lent í rifrildi fyrir leikinn gegn Svíum sem endaði 1-1. Það fór ekki vel í Vieiri: "Þetta er það nýjasta sem þið hafið fundið upp á, það hefur aldrei vafist fyrir ykkur að finna upp eitthvað! Á fundinum lét Vieri þetta meðal annars flakka áður en hann stormaði út: "Þetta er síðasti dagurinn sem ég tala við ykkur. Þið getið talað um fótbolta, mér hefur alltaf verið nákvæmlega sama hvað þið skrifið. Þið getið sagt hvað sem þið viljið um mig sem leikmann en þegar þið móðgið mig sem persónu, jæja, ég er meiri maður en þið allir til samans! Þið getið sagt að ég sé ekki í formi og að ég skori ekki lengur mörk. Eins og ég sagði, mér er alveg sama núorðið því ég lifi fyrir mig en ekki ykkur. En nú hafið þið búið til svo margar sögur. Við höfum alltaf borið virðingu fyrir vinnu ykkar en þið hafið ekki sýnt okkur neina virðingu á móti. Þið slátrið okkur frá morgni til kvölds," sagði Christian Vieri og er nú kominn í hóp með ekki ómerkari manni en Ólafi Þórðarsyni og neitar að tjá sig við fjölmiðla þótt reyndar tali Óli við suma. Gianluigi Buffon neitar einnig öllum sögusögnum um meint rifrildi við Christian Vieri og var ómyrkur í máli í garð ítalskra fjölmiðla: "Þetta er allt saman bara tómt kjaftæði. Ef það er verið að gagnrýna okkur fyrir það hvernig við spilum þá er það í lagi. En þegar persónulegar árásir á menn blandast inn í umfjöllunina ásamt fölsuðum fréttum, þá er það einfaldlega móðgandi og ekki hægt að sætta sig við það," sagði reiður Buffon.