Skólpið út fyrir stórstreymisfjöru

Ekki snúast allar framkvæmdir í Fjarðabyggð um álversframkvæmdir. Daglegur rekstur sveitarfélagsins hefur heldur aukist við þær framkvæmdir, en daglegt líf gengur sinn vanagang og kappkostað er þessa dagana að nota veðurblíðuna til að framkvæma verk sem hafa beðið. Það á t.d. við um lagningu skolpleiðslu út fyrir stórstreymisfjöru. Því var komið fyrir neðan við Bakkahverfið þar sem lengi hefur staðið til að gera bragarbót á frárennslismálum. Skólprörið sem stóð út úr bakkanum neðan við íbúabyggðina gekk almennt undir nafninu "fallbyssan" og var mörgum mikill þyrnir í augum. Notið var aðstoðar sanddæluskips sem er á Norðfirði og verður uppgröftur úr höfninni notaður til að þekja rörið.