Lögregla óskar aðstoðar

Lögreglan í Reykjavík biður almenning um aðstoð við að upplýsa hver konan er sem fannst látin í fjörunni neðan við Fossvogskirkjugarð í Fossvogi rétt fyrir klukkan þrjú í gær. Vegfarandi gekk fram á lík konunnar sem lá á grúfu í flæðarmálinu og gerði lögreglu viðvart. Hin látna virðist vera íslensk en bar engin skilríki á sér. Þá er engrar konu saknað svo að lögregla viti. Konan er 165-170 cm á hæð, dökkskolhærð, rúmlega meðalmanneskja í holdum og trúlega á milli 60 og 70 ára. Á henni voru engir skartgripir. Hún var klædd í of stóra bláa og hvíta strigaskó, brúnar buxur, þunna bláa peysu og aðra þykkri svarta utan yfir. Ef einhver kannast við þessa lýsingu er hann beðinn um að hafa samband við lögregluna í Reykjavík í síma 569 9012. Ekki leikur grunur á að konan hafi orðið fórnarlamb glæps.