Erill hjá lögreglunni

Mikill erill hefur verið hjá lögreglu víða um land um helgina og jafnvel frá því fyrir sautjánda júní. Á Akureyri hefur verið í ýmsu að snúast, ölvun, ölvunarakstur og pústrar, án þess þó að stórslys hafi hlotist af. Fjöldi ferðamanna er á tjaldstæði bæjarins og hefur lögreglan þurft að fara ítrekað þangað. Á Ísafirði hefur einnig verið erill en þangað komu ferðamenn snemma og eru margir. Tvær bílveltur urðu í umdæmi Selfosslögreglunnar. Laust fyrir klukkan sjö í gærkvöldi valt bíll í Þingvallasveit. Hann fór fimm veltur en ekki er talið að alvarleg slys hafi orðið á fólki og ekki heldur þegar bíll valt laust eftir klukkan sjö á Kjalvegi. Mikið álag hefur verið á lögreglunni á Selfossi, enda umdæmið víðfemt og hafa lögreglumenn þurft að fara á fjölda tjaldstæða sem dreifð eru um umdæmið til að hafa afskipti af ölvuðu fólki. Þrjú ungmenni, tveir piltar og ein stúlka, gista nú fangageymslur lögreglunnar í Reykjavík eftir að þau voru handtekinn við dælustöðina í Skeljanesi. Fjögur ungmenni höfðu klippt gat á girðingu og voru með bensínbrúsa með sér þegar lögreglan kom á vettvang. Sökum aldurs var eitt ungmennanna flutt heim til sín en hin bíða yfirheyrslu. Þau hafa komið við sögu lögreglunnar áður. Talið er að þau hafi verið að stela bensíni og hugsanlega einhverju fleiru.