Byssu úr El Grillo landað

Köfurum hefur tekist að ná fágætri þriggja tonna byssu af El Grillo sem legið hefur á botni Seyðisfjarðar í sex áratugi. El Grillo hefur legið á um 50 metra dýpi á botni Seyðisfjarðar í 60 ár eða frá því að skipinu var sökkt af þýskri flugvél. Búið var að ná tveimur byssum af skipinu en sú sem nú er komin á þurrt er sú stærsta þeirra og vegur þrjú tonn. Kafararnir voru í um það bil viku að vinna verkið en þeim tókst meðal annars að búa til loftrúm í kassanum undir byssunni og gátu því staðið þar með höfuðið upp úr. Byssan virðist ágætlega farin og inni í boltunum, sem héldu henni niðri, má enn sjá koppafeiti. Mikill fögnuður ríkti eftir að búið var að losa byssuna af El Grillo. Hún var síðan flutt í land og sýndu Seyðfirðingar og fleiri byssunni mikinn áhuga enda mun þetta vera fágætur gripur. Árni Kópsson, sem fór fyrir köfurunum, segir verkefnið hafa verið mjög  skemmtilegt og hafa gengið mjög vel. Skipið sé mikilfenglegt og gaman sé að kafa ofan í það - í raun hrein paradís fyrir sportkafara.