Ákvörðun dómsmálaráðuneytis ógild

Hæstiréttur ógilti í dag ákvörðun dómsmálaráðuneytisins um að vísa litháískum morðingja og nauðgara úr landi. Litháinn kom til Íslands seint árið 1999 og fékk dvalarleyfi til febrúarmánaðar 2001. Í ársbyrjun bárust lögreglunni upplýsingar um að maðurinn hefði gerst sekur um alvarleg afbrot í heimalandi sínu. Við eftirgrennslan kom í ljós að árið 1995 hafði hann nauðgað og myrt unga konu. Maðurinn greindist geðklofi og var vistaður á lokuðu geðsjúkrahúsi í framhaldinu. Hann var látinn laus þaðan 1999 og kom til Íslands í kjölfarið. Lögreglan hér á landi yfirheyrði manninn og sagðist hann getað stundað vinnu og lifað eðlilegu lífi með aðstoð lyfja. Málinu var vísað til útlendingaeftirlitsins sem, að fengnum upplýsingum að utan, leitaði eftir afstöðu dómsmálaráðuneytisins sem óskaði eftir því að geðlæknar á Landspítalanum rannsökuðu manninn en því var neitað nema dómstólar, ákæruvald eða verjandi leitaði eftir slíku. Útlendingaeftirlitið taldi sig því þurfa að taka ákvörðun á grundvelli fyrirliggjandi gagna og vísaði manninum úr landi. Það var kært til dómsmálaráðuneytisins sem staðfesti úrskurðinn en þá hafði maðurinn útvegað frekari gögn að heiman sem sýndu að hann þarfnaðist ekki frekari læknismeðferðar. Hæstiréttur taldi slíka annmarka á málsmeðferð útlendingaeftirlitsins að ógilda bæri úrskurð dómsmálaráðuneytisins um staðfestingu.