Kynferðisbrotamaður fær 10 mánuði

Kynferðisbrotamaður hefur verið dæmdur í tíu mánaða fangelsi fyrir kynferðisbrot gegn tveimur stúlkum sem þá voru 6 og 7 ára gamlar. Honum er jafnframt gert að greiða hvorri stúlku um sig 300.000 krónur í miskabætur. Hæstiréttur staðfesti í dag dóm Héraðsdóms Reykjaness þessa efnis frá því í janúar á síðastliðnum. Brotin áttu sér stað á árunum 2000-2002 og var önnur stúlkan nágranni mannsins en hin bjó rétt hjá vinnustað hans. Maðurinn var sakaður um að hafa káfað á kynfærum annarrar stúlkunnar innanklæða, lagt getnaðarlim sinn við kynfæri hennar og fróað sér fyrir framan hana. Brotið gegn hinni stúlkunni fólst í því að hinn dæmdi sleikti og tók myndir af kynfærum telpunnar. Brotin áttu sér stað á vinnustað mannsins og í bifreið hans en hinn ákærði neitaði sök fyrir dómi. Maðurinn hefur tvisvar áður hlotið dóm og tvisvar gengist undir sáttir, aðallega fyrir brot gegn áfengis- og umferðalögum.