Tóku saman þátt í opinberri athöfn

Forseti Íslands og forsætisráðherra tóku saman þátt í opinberri athöfn í dag í fyrsta sinn frá því forsetinn synjaði lagafrumvarpi forsætisráðherrans staðfestingar. Strikum yfir stóru orðin, standa við þau minni reynum sagði forsætisráðherra og vitnaði í kvæði eftir Hannes Hafstein. Lýðveldið Ísland er sextíu ára í dag en hápunktur þjóðhátíðarinnar var á Austurvelli þegar forseti Íslands og forsætisráðherra gengu saman hlið við hlið að styttu Jóns Sigurðssonar. Samskipti þeirra einkenndust af formfestu í dag en að venju kom það hlut forsetans að leggja blómsveiginn að styttu Jóns Sigurðssonar. Margir biðu spenntir eftir því að heyra hvort forsætisráðherra myndi í ávarpi sínu koma inn á síðustu atburði í stjórnmálunum en það gerði hann ekki, að minnast kosti ekki með beinum hætti. "Þegar Alþingi tekst best til í verkum sínum er árangurinn mikill fyrir land og þjóð og leiðin til betra lífs greiðari fyrir sérhvern mann. Þó er það svo að virðing fyrir þinginu hefur verið með ýmsum hætti í gegnum tíðina og algengara er en ætla mætti að hnýtt sé harkalega í þá sem þar sýsla í þjóðarumboði. Þingið hefur jafnvel orðið fyrir beinum sem óbeinum árásum og var hin harkalegasta þeirra þegar þegar lýðveldið Ísland var aðeins fárra ára gamalt." Davíð hyggst láta af embætti forsætisráðherra í haust en þannig lauk ávarpi sínum í dag með því að óska löndum sínum farsældar í framtíð og þakkaði þeim þolinmæði og umburðarlyndi við sig.