Fjölbreytt hátíðarhöld um landið

Íslendingar fagna í dag, sautjánda júni, sextíu ára afmæli lýðveldisins. Tímamótunum fagna landsmenn um allt land með fjölbreyttum hætti. Formleg dagskrá hófst í morgun klukkan tíu þegar blómsveigur var lagður að leiði Jóns Sigurðssonar í Suðurgötukirkjugarði. Í Reykjavík leggja skrúðgöngur af stað klukkan 13:40 frá Hagatorgi og Hlemmi. Á Akureyri verður gengið frá Hamarkotsklettum að Ráðhústorginu klukkan tvö. Lúðrasveit Akureyrar spilar og skátar leiða gönguna. Á Ísafirði hefst skrúðganga klukkan hálf tvö á Silfurtorgi. Á Egilsstöðum verður gengið úr miðbænum frá Hótel Héraði klukkan eitt. Athyglisverður knattspyrnuleikur fer einnig fram í bænum í kvöld, þegar "vináttulandsleikur" fer fram á milli Egilstaðaúrvals fyrir hönd Íslands, og úrvalsliðs Kárahnjúka. Klukkan 13:15 leggur skrúðganga af stað frá hótel Selfossi, og í kvöld verður meðal annars harmónikkuball í Tryggvaskála. Í Borgarnesi leggur skrúðganga af stað 13:45 frá kirkju og heldur niður í Skallagrímsgarð, þar sem hátíðardagskráin fer fram. Í gamla mjólkursamlagshúsinu hefst svo unglistahátíðin Mímís í kvöld. Og í Reykjanesbæ leggur skrúðganga undir stjórn skáta af stað frá kirkjunni klukkan tuttugu mínútur í tvö. Lúðrasveit Tónlistarskóla Reykjanesbæjar spilar undir. Í kvöld verður svo mikil skemmtun í Reykjaneshöllinni.