Engin sárindi

Ólafur Ragnar Grímsson, forseti Íslands, afhendir heiðursverðlaun Leiklistarsambands Íslands á Grímunni í Borgarleikhúsinu í kvöld. Guðrún Helgadóttir, rithöfundur og fyrrverandi forseti Alþingis, afhendir verðlaun fyrir barnaleikrit í fjarveru Vigdísar Finnbogadóttur.  Vigdís Finnbogadóttir, fyrrverandi forseti Íslands, taldi ekki við hæfi að afhenda verðlaun á Grímunni í kvöld, þar sem Baugur væri aðalstryktaraðili hátíðarinnar. Að hennar mati hefði hún þannig tengt forsetaembættið við pólitíska umræðu um fjölmiðlalögin.  Helga Jónsdóttir, framkvæmdastjóri Grímunnar, segir að hátíðin verði haldin með glæsibrag í kvöld, þrátt fyrir þessa ákvörðun Vigdísar, en segist jafnframt undrandi á henni. Hún segir að Vígdísi hafi verið frjálst að afþakka það að veita verðlaunin, leitað hafi verið til fjölda fólks og gátu ekki allir orðið við beiðni þeirra. Engin sárindi væru af hálfu framkvæmdastjórn Grímunnar. Ólafur muni hins vegar afhenda verðlaun í kvöld enda sé hann verndari Grímunnar. Helga segir engan ráðherra veita verðalaun, hins vegar eigi það sér skýringu þar sem flestir séu erlendis. Helga segist ánægð með að Guðrún Helgadóttir afhendi verðlaunin sem Vigdís var beðin um að veita, sem eru fyrir barnasýningu. Hreinn Loftsson, stjórnarformaður Baugs segir að ummæli Vigdísar dæmi sig sjálf. Honum finnist ummælin óviðeigandi en hafi engin áhrif á stuðning fyrirtækisins við góð málefni. Hann voni að þetta fæli ekki önnur fyrirtæki frá því að efla listir og menningu.