Hrun á úthafskarfa

Algjört hrun hefur orðið í veiðum á úthafskarfa á þessu ári miðað við undanfarin ár og hefur aflinn frá áramótum dregist saman um rúm 80 % miðað við sama tíma í fyrra. Samkvæmt aflatölum Fiskistofu frá áramótum til maí loka, höfðu aðeins veiðst 3600 tonn af úthafskarfa á móti 18.600  tonnum á sama tíma í fyrra. Úthafskarfinn hefur verið þýðingarmikil tekjulind fyrir marga frystitogara undanfarin ár og hefur mikið verið veiddur djúpt úti á Reykjaneshryggnum. Þar voru áttatíu og fjórir togarar frá ýmsum löndum þegar flugvél Landhelgisgæslunnar flaug yfir svæðið fyrir nokkrum dögum, þar af sextán íslenskir frystitogarar. Þannig  að sóknarþunginn í stofninn er mjög mikill. Karfavertíðin fyrir yfirleitt vel af stað og því hefðu skipin átt að vera að fá góðan afla síðustu vikurnar, en aflasamdráttur íslensku skipanna í síðasta mánuði einum  nam röskum 76 prósentum.