Hefði verið ábyrgðarleysi

Jónatan Þórmundsson lagaprófessor telur að það hefði verið ábyrgðarleysi af þjóðhöfðingja að stöðva Kárahnjúkamálið. Hann telur að skilja megi orð Vigdísar Finnbogadóttur fyrrverandi forseta í gær svo að hún telji að forseti hafi vald til að synja málum staðfestingar. Vigdís Finnbogadóttir sagðist í gær ekki skilja í forseta Íslands að synja fjölmiðlalögunum staðfestingar, nær hefði verið að gefa þjóðinni tækifæri til að greiða atkvæði um Kárahnjúkavirkjun. Jónatan Þórmundsson sagði í viðtali sem tekið var fyrir tveimur vikum þegar hefði verið búið að kjósa um það mál í kosningum auk þess sem samningaferlið hefði verið komið svo langt á veg að það hefði verið ábyrgðarleysi að stöðva það. Fréttastofa ræddi aftur við Jónatan í dag og segist hann skilja Vigdísi sem svo að hún telji að forseti hefði vald til að synja málum staðfestingar og skjóta málum til þjóðaratkvæðis. Jónatan segir að bæði EES-samningurinn og Kárahnjúkamálið hafi varðað þjóðarhagsmuni en erfitt hefði verið að orða spurningar um þau flóknu mál. Annað gildi um fjölmiðlamálið. Þar væru alls konar grundvallar réttindi í húfi. Aldrei hefði verið kosið um það mál og það væri hvort eð er ekki óafturkræft þó lögunum væri synjað. Þá bætti hann því við um Kárahnjúka að þar hefði ekki verið jafn skýr gjá milli þings og þjóðar.