Guðrún afhendir verðlaun Vigdísar

Guðrún Helgadóttir, rithöfundur, afhendir verðlaun fyrir barnaleikrit í fjarveru Vigdísar Finnbogadóttur fyrrverandi forseta Íslands. Vigdís vildi ekki bendla forsetaembættið við umræðu um fjölmiðlalögin sem hún taldi að yrði óhjákvæmilegt í ljósi þess að Baugur fjármagnar hátíðina. Ólafur Ragnar Grímsson veitir heiðursverðlaun á hátíðinni að vanda. Vigdís Finnbogadóttir afþakkaði boð um að afhenda verðlaun á hátíðinni, sem fram fer í Borgarleikhúsinu í kvöld, vegna þess að hún væri kostuð að hluta til af Baugi. Þegar hún gengi inn á svið myndi fólk óhjákvæmilega hugsa um forsetaembættið í samhengi við fyrirtækið sem tengdist umræðu um fjölmiðlalögin. Hún hefði þó ekkert á móti Baugi. Þetta sagði Vigdís í samtali við fréttamann Stöðvar tvö í gær; henni var sagt að þetta yrði í fréttum það kvöld og hún gerði engar athugasemdir við það. Helga Jónsdóttir, framkvæmdastjóri Grímunnar, sá sér ekki fært um að koma í viðtal við Stöð 2 í dag. Samkvæmt stjórnarmanni Leiklistarsambands Íslands, mun Vigdís ekki hafa gefið stjórninni skýringu á fjarveru sinni og stjórnin ekki velt ástæðunni sérstaklega fyrir sér. Viðar Eggertsson sem situr í stjórn Leiklistarsambands Íslands sagði það vissulega óheppilegt að styrktaraðilar hefðu verið dregnir inn í umræðuna en lítið væri við því að gera. Hins vegar fagni sambandið ávallt þeim sem vilja styrkja menningu.Viðar benti á að stjórnvöld hefðu hvatt til aukinnar samvinnu atvinnulífsins við menningarstarfsemi. Jóhannes Jónsson einn eigenda Baugs sagðist ekki skilja afstöðu Vigdísar Finnbogadóttur. Hann sagðist þó ekki vera móðgaður enda hefði hann sterkan skráp. Hann muni eftir sem áður vera tilbúinn til góðra verka.