Vigdís afhendir ekki verðlaun
Vigdís Finnbogadóttir fyrrverandi forseti Íslands vill ekki afhenda leiklistarverðlaun á Grímunni vegna þess að hátíðin er að hluta til kostuð af Baugi Group. Hún vill forðast pólitíska umræðu. Vigdís segist ekki skilja í forseta Íslands að synja fjölmiðlalögunum staðfestingar. Nær hefði verið að gefa þjóðinni tækifæri til að greiða atkvæði um Kárahnjúkavirkjun. Stofnun Vigdísar Finnbogadóttur í erlendum tungumálum var með eins konar uppskeruhátíð í dag þar sem tekið var á móti á styrk frá Norræna menningarsjóðnum upp á fjóra og hálfa milljón króna og ýmsum velunnurum þakkað. Þá var farið yfir starf stofnunarinnar á síðasta ári og spennandi verkefnum, sem framundan eru, lýst. Vigdís Finnbogadóttir ræddi við fréttamann að athöfninni lokinni og bar þar á góma forsetakosningarnar og lag sem gárungarnir á Baggalút hafa samið Vigdísi til heiðurs en þeir hvetja hana til að bjóða sig fram aftur og segjast sakna hennar. „Þetta er auðvitað liðin tíð í mínu lífi en ég væri nú dálítið skrýtin ef ég fylgdist ekki með þessu. Annars læt ég þetta mig ekki miklu skipta,“ segir Vigdís. Þegar fréttamaður ætlaði að spyrja hana út í þær fregnir sem fréttastofan hafði fengið að Vigdís hefði hætt við að veita verðlaun á Grímunni - íslensku leiklistarverðlaununum sem fram fara á morgun - stöðvaði Vigdís Finnbogadóttir viðtalið og sagðist ekki hafa hætt við að veita verðlaun heldur aldrei samþykkt það. Hún teldi ekki gott að taka þátt í viðburði sem þessum, sem kostaður væri af þessu umdeilda fyrirtæki, á þessum viðkvæma tímapunkti. Með neitun sinni væri hún þó ekki að taka neina afstöðu. Hún hefði ekkert á móti Baugi en vildi ekki draga athyglina frá leiklistarverðlaununum því fólk myndi ósjálfrátt tengja hana við embætti forseta Íslands. Hún sagði þá við fréttamann og myndatökumann að hún skyldi ekki hvers vegna Ólafur valdi þessi lög til að synja staðfestingu. Betra hefði verið að leggja Kárahnjúkavirkjun í dóm þjóðarinnar. Það hefði hún sjálf að líkindum gert í hans sporum.
