Hóta starfsfólki lífláti

Tveir pólitískir flóttamenn sem beðið hafa um hæli hér á landi hafa haft uppi alvarlegar hótanir við starfsfólk Félagsþjónustunnar í Reykjanesbæ samkvæmt heimildum Fréttablaðsins. Þeir hafa hótað starfsfólki líkamsmeiðingum og jafnvel lífláti. Þá hafa þeir að auki hótað hungurverkfalli og að svipta sjálfa sig lífi. Mennirnir komu til landsins með Norrænu í byrjun mánaðarins og gáfu sig fram við lögregluna á Akureyri. Fátítt er að slík mál komi upp á Akureyri og voru mennirnir sendir til Reykjanesbæjar þar sem félagsþjónusta bæjarins hefur samning við Útlendingastofnun um umsjá hælisleitenda. Mennirnir segjast vera frá Hvíta Rússlandi en þeir komu hingað til lands á litháenskum vegbréfum sem þeir segja fölsuð. Lögreglan í Keflavík rannsakar nú uppruna mannanna þar sem þær upplýsingar þurfa að liggja fyrir áður en Útlendingastofnun getur tekið málið til meðferðar. Heimildir segja mennina vera ósátta við að meðferð hælisbeiðnirnar í kerfinu og láta það bitna á starfsfólki félagsþjónustunnar með slíkum hætti að starfsfólkinu standi ekki á sama og sé í stökustu vandræðum með mennina. Hælisleitendur sem eru í umsjá félagsþjónustunnar eru ekki í neinni sérstakri gæslu á meðan þeir bíða þess að mál þeirra fái meðferð. Georg Lárusson, forstjóri Útlendingastofnunar, staðfesti við Fréttablaðið í gær að mennirnir tveir væru í umsjá Félagsþjónustunnar í Reykjanesbæ. Beðið væri eftir upplýsingum um uppruna mannanna áður en hægt væri að taka mál þeirra til meðferðar.