Atvinnuleysi 3,3 %

Atvinnuleysi í maí mældist 3,3 prósent samkvæmt Vinnumálastofnun. Þetta er 0,3 prósentum minna en á sama tíma í fyrra. Í maí síðastliðnum voru skráðir 102.875 atvinnuleysisdagar á landinu öllu, sem jafngilda því að 4.900 manns hafi að meðaltali verið á atvinnuleysisskrá í mánuðinum. Áætlaður mannafli á vinnumarkaði í maí var 147.620. Á höfuðborgarsvæðinu mældist atvinnuleysið 3,7% í maí en 2,6% á landsbyggðinni. Minnst er atvinnuleysið á Norðurlandi Vestra og á Austurlandi, 1,8% en mest á Suðurnesjum og á höfuðborgarsvæðinu, 3,7%. Atvinnulausum körlum fækkaði um 5,9% milli apríl og maí, en atvinnulausum konum fjölgaði um 5,7%.