Fáir afpanta húsnæði

Fáir hafa afpantað sumarbústaðapláss í Húsafelli samkvæmt þeim upplýsingum sem Fréttablaðið fékk frá nokkrum stéttafélögum sem eiga búastaði þar. Ýmsir hafa þó hringt í stéttarfélög sín og kannað stöðu sína. Hjá Verslunarmannafélagi Reykjavíkur og Eflingu fengust þær upplýsingar að fólk geti fengið bústaðaleiguna endurgreidda ef það kýs að afpanta. VR hefur einnig endurgreitt fólki sem veiktist í Húsafelli. Einn félagsmaður Eflingar fór fram á endurgreiðslu vegna veikinda fjölskyldu sinnar, en var synjað á þeim forsendum að ekki liggur fyrir hvað olli veikindunum, en enginn hefur afpantað bústaðarpláss. Iðnsveinafélag Keflavíkur hefur fengið nokkrar fyrirspurnir frá meðlimum sínum en enginn hefur farið fram á endurgreiðslu eða afpantað. Almennt séð höfðu fáir eða engir afpantað bústaði í eigum stéttafélaganna sem rætt var við. Unnið er að sýnatöku í Húsafelli til að kanna hvað valdi veikindum sem komið hafa upp í Húsafelli. Staðarhaldarar hafa ráðlagt dvalargestum að eima neysluvatn á meðan málið er í rannsókn.