Mat miðað við ákveðnar forsendur

"Við sem erum að vinna í þessum hefðbundnu vísindum erum að leggja fram mat okkar miðað við ákveðnar forsendur," sagði Einar Hjörleifsson fiskifræðingur hjá Hafrannsóknarstofnun um fram komna gagnrýni á ráðleggingar Alþjóða hafrannsóknarráðsins um samdrátt í fiskveiðum Færeyinga. "Ef Færeyingar ætla að halda áfram þessari stífu sókn, ef ekki kemur inn góður árgangur, þá er spurning hvort þeir lendi í sama ástandi og þeir voru í í upphafi tíunda áratugarins, þegar afli þeirra fór niður fyrir 10 þúsund tonn nokkuð mörg ár í röð. Sagan hefur sýnt, að þetta hefur gerst," sagði hann. "Ef þeir fá ekki stóra lottóvinninginn aftur eins og þeir fengu 1993 og 1999, þá er þetta framhaldið. Svo er spurningin hversu langt menn ætla að keyra hrygningarstofninn niður með því að halda áfram svona stífri sókn, því á einhverjum tímapunkti hlýtur það að bitna á því að framleiðnin minnkar, en viðheldur ekki kerfinu."