Forsætisráðuneytið svaraði ekki

Formaður þjóðhátíðarnefndar Reykjavíkurborgar segir það sérkennilega stjórnsýslu ef það ferst fyrir hjá forsætisráðuneytinu að svara erindum frá síðasta ári en borgin óskaði eftir samstarfi vegna þjóðhátíðardagsins í tengslum við aldarafmæli heimastjórnarinnar. Reykjavíkurborg óskaði í desember síðastliðnum eftir viðræðum við forsætisráðuneytið um samstarf vegna hátíðahaldanna 17. júní í tengslum við aldarafmæli heimastjórnar á Íslandi. Ekkert svar hefur fengist ennþá en haft var eftir Ólafi Davíðssyni, ráðuneytisstjóra í forsætisráðuneytinu, í Ríkisútvarpinu í morgun að það hefði farist fyrir að svara. Anna Kristinsdóttir, formaður þjóðhátíðarnefndar Reykjvíkurborgar, segir að það hefði ekki átt að fara á milli mála að borgin var að óska eftir samstarfi við forsætisráðuneytið vegna þessa eina þjóðhátíðardags, en ekki um ófyrirsjáanlega framtíð. Hún segir auðvitað of seint núna að svara erindinu.