Hjartaígræðslan gekk vel

Læknar á Sahlgrenska sjúkrahúsinu í Gautaborg í Svíþjóð luku undir morgun við að græða nýtt hjarta í Grindvíkinginn Helga Einar Harðarson, sem þurfti nýtt hjarta eftir hjartaígræðslu fyrir fimmtán árum. Einnig var grætt í hann nýtt nýra. Á þriðja tug manna kom að aðgerðinni í tveimur hópum, annar hópurinn sá um hjartaskiptin og hinn græddi nýrað í. Að sögn Gunnars Brandrups Vognsens, hjartalæknis, í viðtali við Jón Ársæl Þórðarson nú undir morgun, gekk aðgerðin vel og var hann ánægður með ástandið á Helga Einari. Nú tekur við bið eftir því hvort líkami Helga Einars tekur nýju líffærunum eða hafnar þeim.