Veiku fólki vísað frá

Sveinn Magnússon framkvæmdastjóri Geðhjálpar segir að bráðveiku fólki sé ítrekað vísað frá göngudeild geðdeildar Landspítalans. Átján ára stúlku í sjálfsvígshugleiðingum var tvívegis vísað frá göngudeildinni í vetur, en fyrir tilviljun fundu tveir hlauparar hana í Laugardalnum þar sem hún reyndi að svipta sig lífi. Sveinn Magnússon segir skiljanlegt að bráðamótttakan þurfi að meta hvert tilfelli fyrir sig. Vandinn sé sá að fólki sé ekki vísað á nein önnur úrræði. "Bráðamóttakan á auðvitað að vera bráðamóttaka en þegar fólk leitar þangað hefur það að sama skapi ekki í önnur hús að venda," segir Sveinn. Hann segir jafnframt að engar aðrar lausnir séu í boði og nefnir sem dæmi Reykjalund þar sem langir biðlistar séu. Fólk þurfi að bíða allt upp í ár á þeim. Einstaklingar sem leiti til sérfræðinga fyrir utan stofnanir geti þurft að bíða í 3-5 mánuði. Á meðan nokkura mánaða bið er eftir þjónustu geðlækna getur fjöldi sálfræðinga og annarra ráðgjafa hins vegar annað þessari eftirspurn. Sveinn segir að Tryggingastofnun vilji aftur á móti ekki semja við þetta fólk þótt Alþingi hafi falið stofnuninni að gera það fyrir ári síðan. "Í framhaldi af lagasetningu Alþingis hefur ekkert gerst og samkvæmt umsögn manna í samninganefnd heilbrigðis- og tryggingamálaráðuneytisins þá stendur ekkert fyrir dyrum að ganga í þessa samninga," segir Sveinn. Á meðan ekkert gerist er það mörgum offviða að greiða allt að sex þúsund og fimm hundruð krónur fyrir hvert sálfræðiviðtal. Sveinn segir mjög bagalegt og í raun stórhættulegt þegar verið sé að meta alvarleika þeirra tilfella sem leita til göngudeildarinnar, nánast á færibandi, að ekki sé hægt að vísa fólki á nein önnur úrræði. "Ung stúlka í sjálfsvígshugleiðingum kom í tvígang í fylgd aðstandenda á bráðamóttöku Landsspítalans. Henni var vísað frá í bæði skiptin á þeirri forsendu að hún væri ekki "nægjanlega" veik og í kjölfarið fundu tveir tveir hlauparar hana í Laugardalnum þar sem hún reyndi að svipta sig lífi. Ég spyr bara: Hvænær verður slysið?" segir Sveinn Magnússon.