Hvalarannsóknir án þess að drepa

Alþjóðlegi dýraverndunarsjóðurinn ætlar að stunda hvalarannsóknir við Ísland í sumar. Fulltrúar sjóðsins telja sig geta stundað nákvæmari rannsóknir en áður hefur verið hægt og það án þess að drepa dýrin. Sjóðurinn, sem heitir fullu nafni International Fund For Animal Welfare, sótti í janúar um rannsóknarleyfi í gegnum breska sendiráðið hér á landi en hefur enn ekki fengið svar. Í síðustu viku var nýrri 70 feta seglskútu sjóðsins hleypt af stokkunum en hún mun vera vel búin rannsóknartækjum sem eru sérhönnuð og gera mönnum kleift að stunda nákvæmari hljóð- og myndarannsóknir neðansjávar en áður var unnt. Rannsóknarleiðangurinn hefst við Skotlandsstrendur en síðan er ætlunin að stunda rannsóknir í íslenskri landhelgi í júlí og ágúst. Sjóðurinn ætlar að bjóða íslenskum vísindamönnum og nemum að taka þátt í rannsóknunum, eða fylgjast með þeim, og fáist rannsóknarleyfið verður upplýsingunum deilt með íslenskum vísindamönnum og frumgögnin verða afhent Hafrannsóknastofnun.