Davíð dæmdur fyrir meiðyrði

Héraðsdómur Reykjavíkur dæmdi í morgun Davíð Oddsson forsætisráðherra fyrir meiðyrði í garð Jóns Ólafssonar, fyrrverandi aðaleiganda Norðurljósa. Forsætisráðherra sagði í viðtali við fjölmiðla í nóvember síðastliðnum, í tengslum við söluna á eignum Jóns, að þau viðskipti hefðu þann brag að verið væri að kaupa og selja þýfi og að við blasi að maður nokkur sé mesti skattsvikari Íslandssögunnar og banki standi fyrir því að losa eignir hans héðan. Jón stefndi Davíð fyrir meiðyrði og krafðist þess að ummælin yrðu dæmd dauð og ómerk. Einnig krafðist hann þriggja milljóna króna í miskabætur. Í niðurstöðu Héraðsdóms nú rétt fyrir hádegið segir að með ummælum sínum, um að viðskiptin hafi haft yfirbragð þess að höndlað væri með þýfi, hafi Jóni ekki verið líkt við þjóf og forsætisráðherra hafi haft fyrirvara með tilvísun í skattrannsókn á Jóni. Fyrirvarinn hafi hins vegar verið svo óljós að ummælin hafi mátt misskilja þannig að forsætisráðherra væri að halda því fram að Jón væri þjófur. Einnig segir dómurinn að með því að segja að við blasi að Jón sé mesti skattsvikari Íslandssögunnar, með tilvísun í skattrannsóknina, fái sú skoðun ekki næga stoð í ummræddri skýrslu rannsóknarinnar. Dómurinn taldi annmarkana á ummælunum ekki stórvægilega eða til þess fallna að valda stórfelldu tjóni á æru Jóns og dæmdi honum því ekki miskabætur, en að ummæli forsætisráðherra um Jón Ólafsson væru dauð og ómerk.