Fá 14 milljónir í bætur

Félagsmálaráðherra ætlar að beita sér fyrir því að hjónin á Torfastöðum fái allt að því fjórtán milljónir króna í bætur þar sem meðferðarheimili þeirra hafi augljóslega fengið minna greitt frá ríkinu en önnur sambærileg heimili. Hann segir skarð fyrir skildi að samningi heimilisins við Barnaverndarstofu hafi verið sagt upp. Meðferðarheimilið á Torfastöðum í Biskupstungum hefur um árabil tekið við ungu fólki sem á við vanda stríða samkvæmt samningi við Barnaverndarstofu. Barnaverndarstofa greiddi þó að meðaltali þremur og hálfri milljón krónum minna á ári með meðferðarheimilinu á Torfastöðum en sambærilegum heimilum á Geldingalæk og Laugalandi. Þá er ekki tekið tillit til þess að greiðslum til Torfastaða var ætlað að standa undir kostnaði við nám sem hinum heimilunum var ekki ætlað að gera. Hjónin á Torfastöðum sögðu upp samningi sínum við Barnaverndarstofu í fyrra með árs fyrirvara og gáfu upp óvild Braga Guðbrandssonar forstöðumanns sem skýringu. Barnaverndarstofa hefur jafnan vísað slíkum ásökunum á bug. Félagsmálaráðuneytið fól vegna þessa Ríkisendurskoðun í sumar að gera úttekt á starfsemi heimilisins. Í henni kemur meðal annars fram að sú meðferðarþjónusta sem heimilinu var ætlað að veita á samningstímanum hafi verið í viðunandi samræmi við samninginn sem í gildi var á milli heimilisins og ríkisins. Árni Magnússon, félagsmálaráðherra segist halda að um sé að ræða langvarandi samskiptaerfiðleika, sem endi með því að meðferðaraðilarnir á Torfastöðum hafi séð sig knúna til þess að segja samningnum upp, sem sé miður. Árni segir að á Torfastöðum hafi verið rekið merkilegt starf í um 25 ár og það sé skarð fyrir skildi að þess njóti ekki lengur við. Ríkisendurskoðun telur að þungvæg sanngirnisrök megi færa fyrir uppbótargreiðslu til heimilisins til að bæta upp muninn á endurgjaldi til Torfastaða og til meðferðarheimilina á Geldingalæk og Laugalandi. Árni Magnússon segist ætla að beita sér fyrir því að hjónin á Torfastöðum fái bætur vegna þessa mismunar. Hann segir að líklega sé um að ræða 13-14 milljónir króna.En ráðherra vill ekki svara því hvort eitthvað framhald verði á málinu. Hann segir niðurstöðuna þá að mikill trúnaðarbrestur hafi átt sér stað, en það sé alveg ljóst að gera þurfi upp við meðferðaraðila.